Дали додека вежбате правите грешки кои значително ја намалуваат ефикасноста на вежбањето? Дали правите работи кои можат да доведат до повреди?

Без оглед на тоа дали сте ветеран или аматер во фитнесот, важно е да бидете сигурни дека вежбите ги правите правилно!

Затоа проверете! Можеби правите некои од следните грешки:

1. Не се истегнувате доволно.

Секогаш е добро да се истегнете неколку минути пред да вежбате со тоа што ќе се сконцентрирате на мускулите кои ќе ги користите за време на физичката активност. Најважно од се е да правите вежби за истегнување 8-10 минути по фитнесот додека мускулите сеуште се загреани. Кога мускулите ви се сеуште раздвижени помали се шансите за настанување на некоја повреда.

2. Не се загревате доволно.

Истегнувањето е само еден дел од активностите за загревање. Целото тело треба да се загрева постепено за да се подготви за вежбите кои следуваат. За време на загревањето крвта се насочува кон екстремитетите со цел поефикасно да се донесе кислород во активните мускули, се забрзува вашиот пулс за да се задоволи зголемената потреба од кислород, и вашите мускули полека се подготвуваат за понапорно вежбање. Па така, започнете полека првите 5 минути и вашето вежбање ќе биде поефикасно.

3. Не се одмарате по секое вежбање.

Како што на вашето тело му е потребно загревање така му треба и одмор. Потрудете се полека да го намалувате пулсот на срцето. Доколку наеднаш престанете со вежбањето можно е да дојде до задржување на крвта во долните екстремитети и до вртоглавици. Ова е моментот кога треба добро да се истегнете за да ја зголемите вашата подвижност.

4. Вежбате со преголема тежина.

Ова е најчеста причина за настанување на повреди при вежбањето. Преголемата тежина ќе доведе до слаба физичка кондиција и до повреди на другите телови на телото покрај на оние на кои се сконцентрирани вежбите. Бидете свесни за вашите граници. Најефикасниот начин на вежбање е постепеното зголемување на бројот и интензитетот на вежбите како и на отпорот кој го користите.

5. Се грчите додека вежбате.

Вежбањето со преголема тежина може да доведе до грчење на мускулите. Најдобар начин за зајакнување на мускулите е со бавни контролирани движења. Доколку кревањето на голема тежина ви предизвикува грчеви тогаш е многу веројатно да дојде до повреди особено во делот на грбот.

6. Премногу интензивно вежбање.

Не треба да се измачувате ако сакате да бидете физички спремни. Доколку сакате да изгубите од тежината, тогаш најефикасни се умерените вежби. Повремени поинтензивни вежби се во ред кога се работи за професионален атлетски тренинг. Но за оние кои се просечни ентузијасти, преголемиот интензитет ќе доведе единствено до болки и запаление на мускулите.

7. Вежбање со многу мал интензитет.

Ако сакате резултати ќе треба малку повеќе да се потрудите. Не треба да претерувате, но сепак потребно е да го зголемите пулсот на срцето и да го доведете до нивото кое на вас ви одговара.

8. Се потпирате на лентата за трчање додека вежбате на неа.

Доколку се потпирате на лентата за трчање додека вежбате тогаш се лажете себе си и вежбањето апсолутно не е ефикасно. Фокусирајте се на тоа да го поставите интензитет на ниво на кое ќе можете да стоите исправени додека вежбате. Ако навистина сакате да ја подобрите вашата рамнотежа и како и начинот на вежбање, обидете се да ги тргнете рацете од рамките на справата и движете ги како навистина да се качувате по скали.

9. Не пиете доволно вода.

Наспроти повеќето реклами за спортски напитоци, водата е доволна да ја задоволи потребата од течности, освен ако не вежбате повеќе од 2-3 часа на ден. Потрудете се да пиете барем 1,5 до 2 литри вода дневно.

10. Конзумирањето на енергетски чоколатца и спортски напитоци додека вежбате умерено.

Повеќето професионални фитнес тренери се согласуваат дека овие производи не се неопходни се додека вежбате помалку од 2 саати во денот. Сепак, високото ниво на енергија речиси секогаш значи високо ниво на калории кога станува збор за овие производи. Како и да е, најважно е да јадете здрава храна и да пиете препорачано количество вода за да ги почувствувате придобивките од вежбањето.